പൂജ്യം, സംപൂജ്യം

 അൻപത്തിയൊന്ന് ബില്യൺ ടൺ (5100 കോടി ടൺ)! അത്രയും ഹരിതഗൃഹ വാതകങ്ങളാണ് (Greenhouse gases) ഓരോ വർഷവും നാം എല്ലാവരും കൂടി അന്തരീക്ഷത്തിലേക്ക് കടത്തിവിടുന്നത്. അതുകൊണ്ടെന്താ എന്നല്ലേ? പറയാം. ചുരുക്കി പറഞ്ഞാൽ അതുകൊണ്ട് ആഗോളതാപനം (Global warming)  വളരേ കൂടും. മനസ്സിലായില്ലെങ്കിൽ നീട്ടിപ്പറയാം. ആഗോളതാപനം കൂടിയാൽ ഉഷ്‌ണതരംഗം, വരൾച്ച, കൃഷി നാശം, കാട്ടുതീ, കടലാക്രമണം, വെള്ളപ്പൊക്കം, കൊടുങ്കാറ്റ്‌ എന്നുവേണ്ട പത്തു മഹാമാരികൾ ഒരുമിച്ചു വന്നാലുള്ളത്ര ദുരന്തം സംഭവിച്ചേക്കാം, ഒരു നൂറ് വർഷത്തിനകം. അതിന് തടയിടണമെങ്കിൽ ഒരു കാര്യം മാത്രം ചെയ്‌താൽ മതിയാകും. ഈ 5100 കോടി ടൺ പ്രതിവർഷ ഹരിതഗൃഹവാതക  എമിഷൻ (Emission) എണ്ണുന്നുള്ളത് പൂജ്യത്തിൽ (Net-zero) എത്തിക്കണം!

നിങ്ങൾ ചിരിച്ചു, എനിക്കുറപ്പാണ്. ഇപ്പോ നടന്നത് തന്നെ എന്നും വിചാരിച്ചു കാണും. നൂറ് വർഷം കഴിഞ്ഞു സംഭവിക്കുന്ന കാര്യത്തിന് ഇപ്പോൾ പേടിക്കണോ എന്ന് കരുതണ്ട. നൂറ് വർഷം കൂടുമ്പോൾ വരുന്ന മഹാമാരി നിങ്ങൾ കണ്ടില്ലേ? ഇതും അതുപോലെ തന്നെ കാണാൻ കഴിഞ്ഞേക്കും. ഈയിടെ നിങ്ങൾ  അനുഭവിച്ച ഉരുക്കുന്ന ചൂടും, മുക്കുന്ന പ്രളയവും, അലറിയാക്രമിക്കുന്ന കടലും മറ്റെന്തു കൊണ്ടാണെന്നു വിചാരിച്ചു?

പക്ഷെ കാലാവസ്ഥാ വ്യതിയാനവും അതുകൊണ്ടുണ്ടായേക്കാവുന്ന ദുരന്തങ്ങളും ഒഴിവാക്കാൻ കഴിയുന്നതാണ്. അതിന് ആര് വിചാരിക്കണം എന്നാണ്? ഗവൺമെന്റോ? അതോ രാഷ്ട്രീയ പാർട്ടികളോ? അവർക്കൊക്കെ വേറെ പണിയുണ്ട് നാട്ടാരെ! മരം വെട്ടുന്ന, ഖജനാവ് മുടിപ്പിക്കുന്ന മുട്ടൻ പണികൾ. കുറ്റം പറയരുതല്ലോ, കാലാവസ്ഥാ വ്യതിയാന സമ്മേളനങ്ങളിൽ പോയി അവർ ഘോരഘോരം പ്രസംഗിക്കും, ‘ഇപ്പൊ ശെരിയാക്കിത്തരാം’ എന്ന് പറയും. മുപ്പത് വർഷം കൊണ്ട് പൂജ്യം ആക്കിയില്ലെങ്കിൽ അവരുടെ പേര് നിങ്ങളുടെ പട്ടിക്കിടാൻ പറയും. വളർത്തുമൃഗങ്ങളോട് സ്നേഹമുള്ള നമ്മൾ അതൊരിക്കലും ചെയ്യില്ലെങ്കിലും, മുപ്പതു വർഷത്തിനകം ശെരിയാക്കിക്കളയും എന്നാണ് മിക്ക രാജ്യങ്ങളും പറയുന്നത്. അതൊക്കെ എന്തോ ആക്കട്ടെ. എനിക്കവരോടല്ല പറയാനുള്ളത്. നിങ്ങളോടാണ്.

നിങ്ങൾ വിചാരിക്കണം. നിങ്ങൾ മാത്രം വിചാരിച്ചാൽ സുന്ദരമായ മാറ്റങ്ങൾ ഉണ്ടാക്കാൻ കഴിയും സുഹൃത്തേ. പൂജ്യം എത്തിയില്ലെങ്കിലും അതിനടുത്തെത്തിക്കാം.  അത് മതി, ധാരാളം. അതിന് നിങ്ങൾ ചെറിയ (വലിയ)  ചില മാറ്റങ്ങൾ വരുത്തണം, ജീവിത രീതികളിൽ. വേറൊന്നുകൂടിയുണ്ട്. നാം പുറത്തു വിടുന്ന ഹരിതഗൃഹ വാതകങ്ങളുടെ ഇരുപതു ശതമാനത്തിന്റെ നേരിട്ടുള്ള കാരണക്കാർ എന്നെയും നിങ്ങളെയും പോലുള്ളവരും  നമ്മുടെ കുടുംബങ്ങളും ആണ്. ബാക്കി എൺപതു ശതമാനത്തിന് പരോക്ഷമായും നമ്മൾ ഉത്തരവാദികളാണ്. നമുക്ക് വേണ്ടിയാണല്ലോ സാധനങ്ങളും സേവനങ്ങളും സൃഷ്ടിക്കപ്പെടുന്നത്. അതുകൊണ്ട് താഴെപ്പറയുന്ന കാര്യങ്ങൾ പരിഗണിച്ചാൽ വലിയ മാറ്റങ്ങൾ ഉണ്ടാക്കാൻ കഴിഞ്ഞേക്കും.

1.  എല്ലാ ആവശ്യങ്ങൾക്കും പുറത്തുപോകുമ്പോൾ ബൈക്കോ കാറോ എടുക്കണമെന്നില്ല. അടുത്തൊക്കെ നടന്നു പോകാം, അല്ലെങ്കിൽ ഒരു സൈക്കിൾ വാങ്ങൂ. ചുമ്മാ നടക്കണം, അല്ലെങ്കിൽ സൈക്കിൾ ചവിട്ടണം. ആരോഗ്യം ഇങ്ങു പോരട്ടെ.  ഇനി അതൊന്നും പറ്റിയില്ലെങ്കിൽ കഴിവതും പൊതുഗതാഗത സംവിധാനങ്ങൾ ഉപയോഗിക്കാം. മാസ്ക് വക്കാൻ മറക്കണ്ട.

2.  രണ്ടോ മൂന്നോ ആൾക്കാർക്ക് താമസിക്കാൻ എന്തിനാണ് ഏഴും എട്ടും കിടപ്പുമുറികളുള്ള വീടുകൾ. നാലും അഞ്ചും വാഹനങ്ങളും വേണോ? കൂടുതലുള്ള സമ്പത്ത് ഇങ്ങനെ കാഴ്ചകളാക്കി മാറ്റിയിട്ടെന്തു പ്രയോജനം. വീടുകളുടെയും വാഹനങ്ങളുടെയും എണ്ണവും വലിപ്പവും കൂടുന്നതിനോടൊപ്പം അവ കൊണ്ടുണ്ടാകുന്ന ഹരിതഗൃഹ വാതക വ്യാപനവും കൂടും. ചെറുതും കുറവുമാണ് വലുതും കൂടുതലും എന്ന് മനസ്സിലാക്കാം (Less is more), കാലാവസ്ഥാവ്യതിയാന വിഷയത്തിലെങ്കിലും.

3.  വീടുകളിൽ ജൈവഇന്ധനനങ്ങളുടെ (fossil fuels) സഹായത്താൽ ഉൽപ്പാദിപ്പിക്കുന്ന വൈദ്യുതിയുടെ ഉപയോഗം കുറക്കുക. പകരം സോളാർ ഊർജ്ജ സ്രോതസ്സുകൾ ഉപയോഗിക്കാം. സോളാർ സെല്ലും ബാറ്ററിയുമൊക്കെ നോക്കിയും കണ്ടും വാങ്ങണം എന്ന് മാത്രം.

4.  ഇറച്ചിയുടെയും പാലിന്റെയും ഉപയോഗം കുറച്ചാൽ ഹരിതഗൃഹ വാതകങ്ങളുടെ വ്യാപനം കുറക്കാം. കന്നുകാലി വളര്‍ത്തല്‍ ഹരിതഗൃഹ വാതകങ്ങളുടെ ഉൽപ്പാദനത്തിൽ ഗണ്യമായ പങ്കുവഹിക്കുന്നു എന്നതാണ് കണക്കുകൾ സൂചിപ്പിക്കുന്നത്. കഴിയുമ്പോഴൊക്കെ കട്ടൻ ചായയും പച്ചക്കറികളും പരീക്ഷിക്കാവുന്നതാണ്. ഖേദിക്കേണ്ടിവരില്ല.

5.  വീട്ടുസാധനങ്ങൾ, പ്രത്യേകിച്ചും ഇലക്ട്രോണിക്/ഇലക്ട്രിക്കൽ ഉപകരണങ്ങളുടെ  ഊർജ്ജക്ഷമത (Energy efficiency) ഉറപ്പുവരുത്തണം. മിക്കവാറും ഉപകരണങ്ങളിൽ ഊർജ്ജക്ഷമതയുടെ തോത് അടയാളപ്പെടുത്തിയിട്ടുണ്ടാകും. അവയൊക്കെ വാങ്ങുന്നതിനുമുൻപ് ഊർജ്ജക്ഷമത കൂടുതലുള്ള ഉപകരണങ്ങൾ തിരഞ്ഞെടുത്താൽ ഉപകാരമാകും, നിങ്ങൾക്കും, നാട്ടുകാർക്കും.

6.  ആവശ്യമുള്ള സാധങ്ങൾ മാത്രം വാങ്ങുക. സാധനസാമഗ്രികളുടെ പുനരുപയോഗവും (Reuse) പുനചംക്രമണവും  (Recycle) ശീലമാക്കുക. നിങ്ങൾ പുതുതായി വാങ്ങുന്ന ഓരോ സാധനങ്ങളും സേവങ്ങളും ഉണ്ടാക്കുവാൻ ഹരിതഗൃഹ വാതകങ്ങളുടെ മേഘാവലിയുണ്ടായ്‌വരും എന്ന് മറക്കാതിരിക്കുക.

ഹരിതഗൃഹവാതകങ്ങളെ  പൂജ്യത്തിലെത്തിച്ചു സംപൂജ്യരായാൽ നമുക്ക് കൊള്ളാം. മഹാമാരികണ്ട കണ്ണുകൾക്കിനിയൊരു ദുരന്തം കാണുവാനുള്ള കരുത്തില്ല. മഹാമാരി കവർന്നു ബാക്കിവച്ച ഇത്തിരിക്കനവുകൾ കട്ടെടുക്കാൻ ഇനിയൊരു ദുരന്തവും എങ്ങോട്ടു വരേണ്ടതില്ല. വിളിച്ചില്ലെങ്കിൽ അവയൊന്നും ഇങ്ങോട്ടു വരുവാനും പോകുന്നില്ല!

വിളിച്ചു വരുത്തണോയെന്ന് നമുക്ക് തീരുമാനിക്കാം.

സുമേഷ് രാമചന്ദ്രൻ