പുതുവർഷം-2022

 ഇരുപത്തൊന്നാം നൂറ്റാ-

ണ്ടിന്റെയായുസ്സിൽനിന്നും

ഒരു കൊല്ലവും കുടെ-

യിന്നിതാ കൊഴിയുന്നു.

അറിയാം പ്രപഞ്ചത്തിൻ

ശ്വാസധാരയിലെന്നും

വെറുതെയൊരു മാത്ര

മാത്രമീസംവത്സരം.

എങ്കിലുമല്പായുസ്സാം

മാനവകുലത്തിനു

സങ്കടക്കടലിലെ

യുഗമായതു മാറി.

നിയതിതൊടുത്തൊരു

ജൈവബാണത്തിൽനിന്നു

ഭയപ്പാടോടെ യോടി-

യൊളിച്ചു, നരകുലം.

കോടി ജന്മങ്ങൾ ബലി

കൊടുത്തെങ്കിലുമിന്നും

തേടുന്നു മരണത്തിൻ

കരങ്ങൾ മനുഷ്യരെ!

പ്രതിസന്ധികളോളം-

തല്ലുമാഴിയിൽ നിന്നും

അമൃതം കടഞ്ഞെടു-

ക്കാൻ, ഞങ്ങൾ ശ്രമിക്കുന്നു.

വരവേൽപ്പിനു കാത്തു-

നില്ക്കാതെ വീണ്ടുമൊരു

പുതുവത്സരം വന്നു

വാതിലിൽ മുട്ടീടുമ്പോൾ,

നരവംശമീ മണ്ണിൽ

നിലനില്ക്കണമെങ്കിൽ

കരുതൽ വീണ്ടും വേണ-

മെന്നു നാം പഠിക്കുന്നു

സ്ഥലകാലത്തിൻ പരി-

മിതികളറിയാതെ,

നിലതെറ്റിയ പട്ടം

താഴേക്കു പതിച്ചാലും

നരജന്മവുമണു-

ജന്മവുമൊന്നാണെന്ന

പൊരുളുൾക്കൊള്ളാതിന്നു-

മലയുന്നവർ നമ്മൾ!

മംഗളാനന്ദൻ